ئەنجومەنی پارێزگای سلێمانی

گرفتەکانى ئاو و کارەبا لە سلێمانى و چەمچەماڵ تاووتوێ کران

10/8/2020 133 جار خوێندراوەتەوە

ڕۆژی دووشەممە ٢٠٢٠/٨/١٠ بە سەرپەرشتی بەرێز (ئازاد محەمەد ئەمین) سەرۆکی ئەنجومەنی پارێزگای سلێمانی و ئامادەبونی لیژنەکانی وزە و شارەوانی و پلان و پرۆژەکان، کۆبونەوەیەک لەگەڵ بەڕێزان قایمقامی چەمچەماڵ و بەڕێوەبەری گشتی کارەبا و بەڕێوەبەری ئاو ی سلێمانی و بەڕێوەبەری ئاوی دەوروبەری سلێمانی و نوێنەری پارێزگای سلێمانی کرا.
لە سەرەتادا باسی کێشەکانی ئاو و شکانی بەردەوامی بۆرییەکانی پرۆژەی ئاوی دوکان سلێمانی و پرۆسەی چاکسازی و نۆژەنکردنەوەیان و گرفتی کارەبا کرا.
سەرۆکی ئەنجومەنی پارێزگا رایگەیاند: پێویستە حکومەتی ھەرێم بۆ پرۆسەی چاککردنەوەی بەردەوام و دابینکردنی پێداویستییەکانی کەرتەکانی ئاو و کارەبا، جیاوازتر لە سێکتەرەکانی تر بودجە دابین بکات کە پێشتریش ڕەزامەندی لەسەر ئەو بودجانە دراوە.
پاشان بە وردی تیشکخرایە سەر کەمی ئاو لە قەزای چەمچەماڵ و ڕێگا و ھەنگاوەکانی چارەسەر، بەجۆرێک خزمەتی دانیشتوانی ئەو قەزایە بکات و کێشەکەیان چارەسەر ببێت.
لە کۆتاییدا بڕیاردرا بە ھاوکاری بەڕێوەبەری ئاوی سلێمانی بڕێک ئاو بەپێی خشتەی ئاوی پارێزگای سلێمانی بۆ چەمچەماڵ دابین بکرێت.

 

1829181082020_2.jpg

2429181082020_3.jpg

Copyright © all rights reserved .Developed by Avesta Group and powered by Microsoft Azure